حوار بين سائق تاكسي و زبونة

الست ما كانش عاجبها ان السواق بيلعن و يشتم في كل حاجة في البلد، و بمجرد ما جاب سيرة مرسي..... قالتله بمنتهى القرف
" الراجل حيعمل ايه؟ كان الله في عونه مع كل الفساد و السرقة و الخراب، و المشاكل اللي لقاها في البلد، و الابقاق المفتوحة ليل نهار بتقول هات..." بس يا سيدي و دي كانت بداية انفجار

السواق اللي لف و كان حيعمل حادثة و وقف العربية و قال لها:
" لا مؤاخذة يا مدام، لما الأستاذ مرسي جه مع أهله و عشيرته علشان يتقدم للحاجة مصر، محدش ضحك عليه، و كان عارف كل ظروفها وعارف انها متجوزة قبله 3 رؤساء، و خلفوا منها عيال اد كده.... رامية نصهم على القهاوي و الباقي بيشموا كله في الخرابات و قالوا له ان عندها أمراض متلتلة و بتشخر و هي نايمة. رايد يابن الحلال؟ الراجل كان رايدها و حارب علشان ياخدها...ييجي بقى بعد ما يكتب الكتاب.. و يمضي على عقد معاينه نفي للجهالة.. يقول دي طلع فيها و عليها؟ يا أستاذة محدش ضحك عليه... محدش قال له هنجوزك نانسي عجرم و يوم الدخلة صحى لقاها سيدة العمشة....

و بعدين مع احترامي لسيادتك لو حضرتك حسبتيها صح... مرسي اللي ضحك على مصر... لما اتقدملها قال انه دكتور و مهندس و بتاع فضاء و هيهنيها و يشبعها... و هما شهرين لقيناه بيقول...لما القرد يموت، القرداتي حيعمل ايه؟؟؟ و ماشي يقول انه انضحك عليه... طيب ما بتوع المعارضة بيقولوا له طلقها....مش عايز ليه؟... اهم هيرفعوا عليه قضية خلع علشان ما بيقيمش حدود الله معاها، و هاجر المعارضة في الفراش...
هو حضرتك نازلة هنا و لا مستنية النهضة زينا